Home >>> బిజినెస్ > భారీగా పెరగనున్న ఎయిర్టెల్ టారీఫ్ ధరలు!! కన్ఫర్మ్ చేసిన ఎయిర్టెల్ చైర్మన్!!
టెలికామ్ రంగంలో జియో సృష్టించిన సంచలనాన్ని ఎలా మర్చిపోగలం. 1GB డేటా కొనాలంటే ఒకప్పుడు 200పైనే ఖర్చు పెట్టేవాళ్ళం. జియో వచ్చింది ఉచిత వాయిస్ కాల్స్, ఫ్రీ డేటా అందించింది. కష్టమర్లంతా పండుగ చేసుకున్నారు. కానీ టెలికామ్ రంగంలో ఇదొక పెను ఉప్పెన అనే చెప్పాలి. మిగతా టెలికామ్ సంస్థలన్నీ దిగిరాక తప్పలేదు.
ప్రస్తుతం ఇంచుమించు అన్ని టెలికామ్ సంస్థల టారీఫ్ ప్లాన్స్ దగ్గరగానే ఉన్నాయి. అయితే ఎయిర్టెల్ ప్రస్తుతం టారీఫ్ ప్లాన్స్ పెంచే యోచనలో ఉన్నట్టు సంస్థ చైర్మన్ సునీల్ భారతీ మిట్టల్ వెల్లడించారు.
తాజాగా మొబైల్ వరల్డ్ కాంగ్రెస్ లో ప్రసంగించిన సునీల్ 'చాలా మూలధనాన్ని కంపెనీ తీసుకొచ్చిందని, అదే బ్యాలెన్స్ షీట్ ను బలంగా చేసిందంటూ చెప్పుకొచ్చారు. అయితే పరిశ్రమలో మూలధనంపై రాబడి చాలా తక్కువగా ఉందనీ, దాన్ని మార్చాల్సిన అవసరం ఉందని చెప్పారు.
భారతీయ టారిఫ్ పరిస్థితిలో రావాల్సిన చిన్న మార్పుల గురించి మాట్లాడుతున్నామని, ఈ సంవత్సరం పెంపు ఉంటుందని తాను ఆశిస్తున్నట్టు చెప్పుకొచ్చారు.
అయితే ఈ పెంపు తక్కువగా ఉంటుందని చెప్పిన సునీల్ మిట్టల్ ''జీతాలు పెరిగాయి. అద్దెలు పెరిగాయి. కానీ ఒక్కటి మాత్రం అలాగే ఉంది. దాని గురించి ఎవరూ మాట్లాడరు. ఎలాంటి ఖర్చు చేయకుండానే ప్రజలు 30 జీబీని వాడుకుంటున్నారు'' అంటూ ఆసక్తికర వ్యాఖ్యలు చేశారు. దేశంలో ఓ బలమైన టెలికామ్ కంపెనీ ఉండాల్సిన అవసరం ఉందంటూ వ్యాఖ్యానించారు.
